Жанчына на вайне: адметнасць увасаблення вобраза на прыкладзе аповесці І. Шамякіна «Гандлярка і паэт»

Abstract

У артыкуле прааналізавана аповесць І. Шамякіна “Гандлярка і паэт”. Увага звернута на адметнасць увасаблення вобраза Вольгі Ляновіч, духоўную эвалюцыю гераіні. Акцэнтуецца ўвага на паказе яе трагедыі найперш як жанчыны. Мэта даследавання – прасачыць змены ва ўнутраным свеце і псіхалогіі гераіні, якія прадвызначылі высокі ідэйна-мастацкі ўзровень аповесці, яе наватарскі характар. І. Шамякін, падаючы ў якасці цэнтральнага персанажа гандлярку з Камароўкі, паказаў катарсіс душы гераіні, яе маральнае станаўленне і самасцвярджэнне. Падрабязна, псіхалагічна дакладна і праўдзіва намаляваў, як маральныя крытэрыі, выпрацаваныя камароўскім асяроддзем, якімі Вольга вымярае ўласныя ўчынкі і ўчынкі іншых людзей, у выніку раптоўнай змены грамадскапалітычных абставін складваюцца ў новую філасофію жыцця. Працэс гэтых змен, у выніку якіх вырастала прыгажосць гэтага жаночага характару, паказаны ва ўсёй яго цяжкасці і пакутлівасці.